Hoppa yfir valmynd
28. júní 2010 Félags- og vinnumarkaðsráðuneytið

Mál nr. 19/2010

Mánudagurinn 28. júní 2010

A

gegn

Vinnumálastofnun-Fæðingarorlofssjóði

 

Úrskurður

Mál þetta úrskurða Jóna Björk Helgadóttir hdl., Gunnlaugur Sigurjónsson læknir og Heiða Gestsdóttir lögfræðingur.

Þann 4. maí 2010 barst úrskurðarnefnd fæðingar- og foreldraorlofsmála kæra A, dags. 30. apríl 2010. Kærð var ákvörðun Vinnumálastofnunar-Fæðingarorlofssjóðs (hér eftir nefndur Fæðingarorlofssjóður) sem tilkynnt var með bréfi, dags. 14. apríl 2010, um útreikning á greiðslum frá Fæðingarorlofssjóði.

Með bréfi, dags. 17. maí 2010, óskaði úrskurðarnefnd fæðingar- og foreldraorlofsmála eftir greinargerð Fæðingarorlofssjóðs sem barst með bréfi, dags. 7. júní 2010.

Greinargerðin var send kæranda til kynningar með bréfi, dags. 9. júní 2010, og henni gefinn kostur á að koma að athugasemdum. Frekari athugasemdir bárust frá kæranda hinn 24. júní 2010 í ódagsettu bréfi en þar ítrekar kærandi sjónarmið sín.

 

I.

Sjónarmið kæranda.

Kærandi greinir frá því að Fæðingarorlofssjóður hafi byggt útreikning á greiðslum úr Fæðingarorlofssjóði til hennar á greiðslum sem hún fékk í fæðingarorlofi með eldra barni sem dreift hafi verið yfir á eitt ár. Af þeim sökum telur kærandi að Fæðingarorlofssjóður hafi misreiknað greiðslurnar um helming og um leið brotið lög um fæðingar og foreldraorlof, nr. 95/2000 (ffl.). Máli sínu til stuðnings vísar kærandi til 13. gr. þeirra laga þar sem fjallað er um rétt foreldra til greiðslna úr Fæðingarorlofssjóði. Þá telur kærandi að lög um fæðingar- og foreldraorlof séu skýr hvað varði greiðslur úr Fæðingarorlofssjóði. Sem viðmið um tekjur vegna yngra barns í fæðingarorlofi eigi að miða við þær tekjur sem útreikningur vegna eldra barns var miðaður við en ekki við greiðslurnar sjálfar úr Fæðingarorlofssjóði. Um þetta vísar kærandi til 13. gr. ffl., þar sem segi: „Þegar um er að ræða greiðslur úr Fæðingarorlofssjóði... á viðmiðunartímabili skal taka mið af þeim viðmiðunartekjum sem þær greiðslur miðuðust við og skal aldrei taka mið af hærri fjárhæð en nemur þeim viðmiðunartekjum...“

Fæðingarorlofssjóði hafi því ekki verið heimilt að reikna kæranda tekjur eins og gert hafi verið.

 

II.

Sjónarmið Fæðingarorlofssjóðs.

Af hálfu Fæðingarorlofssjóðs kemur fram að kærandi hafi með umsókn, dags. 14. janúar 2010, sótt um greiðslur úr Fæðingarorlofssjóði í sex mánuði vegna væntanlegrar barnsfæðingar 17. maí 2010.

Auk umsóknar kæranda hafi borist vottorð vegna væntanlegrar barnsfæðingar, dags. 19. janúar 2010, tilkynning um tilhögun fæðingarorlofs, dags. 20. janúar 2010, launaseðill fyrir mars 2010 og fæðingarvottorð, dags. 6. maí 2010. Enn fremur hafi legið fyrir gögn vegna eldri umsóknar kæranda í fæðingarorlofi vegna barns sem fæddist Y. febrúar 2009 og upplýsingar úr skrám ríkisskattstjóra og Þjóðskrá.

Með bréfi Fæðingarorlofssjóðs til kæranda, dags. 14. apríl 2010, hafi henni verið tilkynnt að umsókn hennar um greiðslur úr Fæðingarorlofssjóði hafi verið samþykkt og mánaðarleg greiðsla yrði X kr. á mánuði miðað við 100% orlof. Hinn 20. maí 2010 hafi kæranda verið send greiðsluáætlun með útreikningum á væntanlegum greiðslum og hinn 7. júní 2010 hafi kæranda verið send leiðrétt greiðsluáætlun þar sem mánaðarleg greiðsla var hækkuð í X kr. á mánuði miðað við 100% orlof.

Fæðingarorlofssjóður greinir frá því að skv. 1. mgr. 8. gr. ffl. eigi foreldrar, sbr. 1. mgr. 1. gr., sjálfstæðan rétt til fæðingarorlofs í allt að þrjá mánuði hvort um sig vegna fæðingar, frumættleiðingar eða töku barns í varanlegt fóstur. Þessi réttur sé ekki framseljanlegur. Auk þess eigi foreldrar sameiginlegan rétt á þremur mánuðum til viðbótar sem annað foreldrið geti tekið í heild eða foreldrar skipt með sér.

Í 10. gr. ffl. sé kveðið á um tilhögun fæðingarorlofs. Þar segi í 2. mgr. að með samkomulagi við vinnuveitanda sé starfsmanni þó heimilt að haga fæðingarorlofi á þann veg að það skiptist niður á fleiri tímabil og/eða það verði tekið samhliða minnkuðu starfshlutfalli, sbr. þó 3. mgr. 8. gr.

Í 9. mgr. 3. gr. reglugerðar nr. 1218/2008, um greiðslur úr Fæðingarorlofssjóði og greiðslu fæðingarstyrks, komi fram að ætli foreldri að haga fæðingarorlofi á þann veg að það verði tekið samhliða minnkuðu starfshlutfalli, með samkomulagi við vinnuveitanda, skuli greiðslur úr Fæðingarorlofssjóði nema 80% af meðaltali þeirra heildarlauna sem svari til þess starfshlutfalls sem fæðingarorlofið telst til.

Þá vísar Fæðingarorlofssjóður í 2. mgr. 13. gr. ffl., sbr. 8. gr. laga nr. 74/2008, þar sem kveðið sé á um að mánaðarleg greiðsla Fæðingarorlofssjóðs til starfsmanns í fæðingarorlofi skuli nema 80% af meðaltali heildarlauna og að miða skuli við tólf mánaða samfellt tímabil sem ljúki sex mánuðum fyrir fæðingardag barns eða þann dag sem barn kemur inn á heimili við frumættleiðingu eða töku í varanlegt fóstur. Til launa teljist hvers konar laun og aðrar þóknanir samkvæmt lögum um tryggingagjald sem og greiðslur úr Fæðingarorlofssjóði, greiðslur úr Atvinnuleysistryggingasjóði, sjúkra- og slysadagpeningar, greiðslur úr sjúkrasjóðum stéttarfélaga, bætur frá tryggingafélagi vegna tímabundins atvinnutjóns eða tekjutengdar greiðslur skv. III. kafla laga um greiðslur til foreldra langveikra eða alvarlegra fatlaðra barna, sbr. a-e liði 2. mgr. 13. gr. a. Þegar um sé að ræða greiðslur úr Fæðingarorlofssjóði, Atvinnuleysistryggingasjóði, sjúkrasjóði stéttarfélags, bætur frá tryggingafélagi vegna tímabundins atvinnutjóns eða tekjutengdar greiðslur skv. III. kafla laga um greiðslur til foreldra langveikra eða alvarlegra fatlaðra barna á viðmiðunartímabili skuli taka mið af þeim viðmiðunartekjum sem þær greiðslur miðuðust við og aldrei skuli taka mið af hærri fjárhæð en nemi þeim viðmiðunartekjum enda þótt foreldri hafi fengið mismuninn milli þessara greiðslna og viðmiðunartekna bættan samhliða greiðslunum. Í 2. mgr. 13. gr. laga um fæðingar- og foreldraorlof segi enn fremur að einungis skuli miða við meðaltal heildarlauna fyrir þá mánuði á viðmiðunartímabilinu sem foreldri hafi verið á innlendum vinnumarkaði, sbr. einnig 2. mgr. 13. gr. a.

Fæðingarorlofssjóður vísar einnig til þess að í 1. mgr. 13. gr. a. ffl. segi að þátttaka á innlendum vinnumarkaði í skilningi IV. kafla feli í sér að starfa í annarra þjónustu í a.m.k. 25% starfshlutfalli í hverjum mánuði eða að starfa við eigin rekstur, án tillits til félagsforms, í því umfangi að hlutaðeiganda sé gert að standa mánaðarlega, eða með öðrum reglulegum hætti samkvæmt ákvörðun skattyfirvalda, skil á tryggingagjaldi. Í 2. mgr. sé síðan talið upp í fimm stafliðum hvað teljist enn fremur til þátttöku á vinnumarkaði:

a. orlof eða leyfi samkvæmt lögum, kjarasamningi eða ráðningarsamningi þótt ólaunað sé að hluta eða öllu leyti,

b. sá tími sem foreldri fær greiddar atvinnuleysisbætur, er á biðtíma eftir slíkum bótum eða hefði átt rétt á þeim hefði foreldrið skráð sig án atvinnu samkvæmt gildandi lögum um atvinnuleysistryggingar.

c. sá tími sem foreldri fær greidda sjúkra- eða slysadagpeninga, er á biðtíma eftir dagpeningum eða hefði átt rétt á þeim hefði foreldri sótt um þá til Tryggingastofnunar ríkisins samkvæmt gildandi lögum um almannatryggingar, eða fær greiðslur úr sjúkrasjóði stéttarfélags enda hafi foreldri látið af launuðum störfum af heilsufarsástæðum,

d. sá tími sem foreldri nýtur bóta frá tryggingafélagi sem koma í stað launa vegna tímabundins atvinnutjóns af völdum slysa,

e. sá tími er foreldri fær tekjutengdar greiðslur skv. III. kafla laga um greiðslur til foreldra langveikra eða alvarlegra fatlaðra barna eða hefði átt rétt á slíkum greiðslum hefði foreldri sótt um þær til Tryggingastofnunar ríkisins.

Fæðingarorlofssjóður greinir frá því að í 3. mgr. 15. gr. ffl. sé kveðið á um að útreikningar á greiðslum til foreldris í fæðingarorlofi skuli byggjast á upplýsingum sem Vinnumálastofnun afli um tekjur foreldra úr skattframtölum, staðgreiðsluskrá og tryggingagjaldsskrá skattyfirvalda. Þar segi jafnframt að Vinnumálastofnun skuli leita staðfestingar hjá skattyfirvöldum á því að upplýsingar úr staðgreiðsluskrá og tryggingagjaldsskrá hafi verið í samræmi við álagningu skattyfirvalda vegna viðmiðunartímabila skv. 2. og 5. mgr. 13. gr. laganna.

Þá greinir Fæðingarorlofssjóður frá því að fæðingardagur barns kæranda sé Y. maí 2010 og því skuli, samkvæmt framangreindum laga- og reglugerðaákvæðum, mánaðarleg greiðsla Fæðingarorlofssjóðs til kæranda reiknast sem 80% af meðaltali heildarlauna hennar mánuðina nóvember 2008 til október 2009 enda teljist kærandi samkvæmt fyrirliggjandi upplýsingum hafa verið á innlendum vinnumarkaði þann tíma, sbr. 2. mgr. 13. gr. ffl. og a.-lið 2. mgr. 13. gr. a. ffl. Launalaust leyfi teljist til þátttöku á vinnumarkaði sbr. a-lið 2. mgr. 13. gr. a. ffl. og beri að hafa slíkan tíma með við útreikning á meðaltali heildarlauna foreldris, sbr. 2. mgr. 13. gr. ffl. in fine.

Fæðingarorlofssjóður vísar í úrskurð úrskurðarnefndar fæðingar- og foreldraorlofsmála nr. 9/2010 þar sem fram komi sú meginregla að í þeim tilvikum sem fyrra fæðingarorlof hafi verið tekið samhliða minnkuðu starfshlutfalli á viðmiðunartímabili tekjuútreiknings, sbr. 2. mgr. 10. gr. ffl., beri að skýra 3. tölul. 2. mgr. 13. gr. ffl. svo að greiðslur úr Fæðingarorlofssjóði séu reiknaðar sem hlutfall af viðmiðunartekjum eldra orlofsins þannig að greiðslurnar séu uppreiknaðar í hlutfallinu 100/80. Greiðslur úr Fæðingarorlofssjóði á viðmiðunartímabilinu séu þannig uppreiknaðar, að viðbættum launum vegna starfa foreldris, séu síðan grundvöllur útreiknings viðmiðunartekna í þeim tilvikum sem foreldri hafi verið í skertu starfshlutfalli samhliða fæðingarorlofi.

Á sama hátt verði að líta svo á að foreldri, sem sé í hlutfallslegu fæðingarorlofi án þess að vera samhliða í skertu starfshlutfalli beri sama hlutfall af 80% af viðmiðunartekjunum, og fæðingarorlofshlutfallið segi til um.

Þá greinir Fæðingarorlofssjóður frá því að samkvæmt eldri umsóknargögnum hafi kærandi verið í fæðingarorlofi með barni fæddu Y. febrúar 2009 á hluta viðmiðunartímabils yngra barns hennar sem fæddist Y. maí 2010, þ.e. frá febrúar-október 2009, og þáð greiðslur úr Fæðingarorlofssjóði á því tímabili. Á umsókn um greiðslur úr Fæðingarorlofssjóði, dags. 24. nóvember 2008, komi fram að kærandi sæki um greiðslur í sex mánuði. Á tilkynningu um fæðingarorlof, dags. 24. nóvember 2008, sem sé bæði undirrituð af kæranda og vinnuveitanda hennar komi fram að upphaf fæðingarorlofs skuli miðast við fæðingardag barns og orlofi skuli dreift á lengri tíma samhliða vinnu í skertu starfshlutfalli í tólf mánuði. Í samræmi við það hafi kæranda verið send greiðsluáætlun, dags. 25. febrúar 2009. Kærandi hafi þegið greiðslur úr Fæðingarorlofssjóði til samræmis við það starfshlutfall sem fæðingarorlofið taldist til, þ.e. 37% greiðslur í febrúar 2009 og 50% greiðslur mánuðina mars til október 2009. Meðalmánaðartekjur sem útreikningur greiðslna með eldra barni var byggður á hafi verið X kr. og 80% af því séu X kr. Í samræmi við þágildandi 3. mgr. 13. gr. ffl. hafi greiðslur til kæranda verið lækkaðar niður í X kr. miðað við 100% fæðingarorlof.

Samkvæmt upplýsingum frá ríkisskattstjóra hafi kærandi talið tekjur sínar fram í samræmi við það sem fram komi í staðgreiðsluskrá ríkisskattstjóra um tekjur hennar á framangreindu viðmiðunartímabili og því telur Fæðingarorlofssjóður að þar með liggi fyrir staðfesting á að upplýsingar úr staðgreiðsluskrá hafi verið í samræmi við álagningu skattyfirvalda. Í febrúar 2009 hafi kærandi verið í 37% fæðingarorlofi og 50% fæðingarorlofi mánuðina mars-október 2009 með eldra barni og því beri að uppreikna greiðslur frá Fæðingarorlofssjóði á því tímabili miðað við hlutfall af viðmiðunartekjum í samræmi við töku fæðingarorlofs, sbr. 10. gr. ffl., 2. mgr. 13. gr. ffl. og úrskurð úrskurðarnefndar fæðingar- og foreldraorlofsmála nr. 9/2010. Febrúar 2009 sé þannig uppreiknaður í X kr. og mánuðirnir mars-október 2009 í X kr. Kærandi hafi einnig verið með laun frá B fyrir mánuðina nóvember 2008 til febrúar 2009 sem höfð séu með við útreikninginn. Á tímabilinu nóvember 2008 til október 2009 hafi kærandi fengið greiðslur frá C og í júní 2009 hafi kærandi fengið styrk frá D sem séu undanskildar þar sem ekki sé greitt af þeim tryggingagjald.

Með vísan til framangreinds telji Fæðingarorlofssjóður að leiðrétt greiðsluáætlun til kæranda, dags. 7. júní 2010, beri með sér réttan útreikning á greiðslum úr Fæðingarorlofssjóði.

 

III.

Niðurstaða.

Kærð er ákvörðun Fæðingarorlofssjóðs, dags. 14. apríl 2010, um útreikning greiðslna til kæranda úr Fæðingarorlofssjóði.

Upphafleg greiðsluáætlun kæranda var leiðrétt með greiðsluáætlun, dags. 7. júní 2010, þar sem mánaðarleg greiðsla til kæranda var hækkuð úr X í X kr. miðað við 100% orlof.

Samkvæmt 2. mgr. 13. gr. ffl., sbr. 8. gr. laga nr. 74/2008 og a-lið 16. gr. laga nr. 120/2009, skal mánaðarleg greiðsla Fæðingarorlofssjóðs til starfsmanns í fæðingarorlofi nema 80% af meðaltali heildarlauna að fjárhæð X kr. og 75% af þeirri fjárhæð meðaltals heildarlauna sem umfram er og skal miða við tólf mánaða samfellt tímabil sem lýkur sex mánuðum fyrir fæðingardag barns eða þann dag sem barn kemur inn á heimili við frumættleiðingu eða töku í varanlegt fóstur. Þegar um er að ræða greiðslur úr Fæðingarorlofssjóði, Atvinnuleysistryggingasjóði, sjúkrasjóði stéttarfélags, bætur frá tryggingafélagi vegna tímabundins atvinnutjóns eða tekjutengdar greiðslur skv. III. kafla laga um greiðslur til foreldra langveikra eða alvarlega fatlaðra barna á viðmiðunartímabili skal taka mið af þeim viðmiðunartekjum sem þær greiðslur miðuðust við.

Barn kæranda er fætt Y. maí 2010 og því er viðmiðunartímabil útreiknings meðaltals heildarlauna hennar skv. 2. mgr. 13. gr. ffl. tímabilið nóvember 2008 til október 2009. Óumdeilt er að kærandi var á vinnumarkaði í skilningi ffl. allt viðmiðunartímabilið. Samkvæmt gögnum málsins var kærandi í fæðingarorlofi með barni fæddu Y. febrúar 2009 á viðmiðunartímabilinu, þ.e. frá febrúar til og með október 2009, og fékk greiðslur úr Fæðingarorlofssjóði á því tímabili. Samkvæmt gögnum málsins fékk hún 37% greiðslu í febrúarmánuði 2009, 50% greiðslu mánuðina mars 2009 til janúar 2010 og 13% greiðslu í febrúar 2010. Meðalmánaðartekjur sem útreikningur greiðslna var byggður á voru X kr. en samkvæmt þágildandi ákvæði 2. mgr. 13. gr. ffl. skyldi mánaðarleg greiðsla til foreldris nema 80% af meðaltali heildarlauna, en 80% af fyrrnefndri fjárhæð eru X kr. Voru greiðslur til kæranda miðað við 100% fæðingarorlof lækkaðar í X kr., sbr. þágildandi ákvæði laganna um hámarksgreiðslur. Í samræmi við það voru mánaðargreiðslur til kæranda vegna 50% fæðingarorlofs X  kr., X kr. vegna 37% fæðingarorlofs og X kr. vegna 13% fæðingarorlofs.

Í greiðsluáætlun, dags. 7. júní 2010, eru greiðslur sem kærandi fékk úr Fæðingarorlofssjóði í fyrra fæðingarorlofi uppreiknaðar hlutfallslega í hlutfallinu 100/80 auk þess sem ekki er litið til þágildandi reglna um hámarksgreiðslur. Þannig verður X kr. greiðsla vegna 37% fæðingarorlofs uppreiknuð án skerðingar vegna þágildandi reglna um hámarksgreiðslur í X kr. og greiðsla vegna 50% fæðingarorlofs, X kr., er á sama hátt uppreiknuð í X kr.

Ljóst er að samkvæmt 3. málsl. 2. mgr. 13. gr. ffl. skal við útreikning greiðslna til handa kæranda með yngra barni sínu taka mið af þeim viðmiðunartekjum sem greiðslur í orlofi með eldra barni miðuðust við. Krafa kæranda lýtur hins vegar aðallega að því, að við útreikning greiðslna úr Fæðingarorlofssjóði skuli taka mið af þeim viðmiðunartekjum sem greiðslur úr Fæðingarorlofssjóði með eldra barni hennar voru miðaðar við, án þess að tekið sé tillit til þess að hún hafi dreift fyrra fæðingarorlofi á lengra tímabil í stað 100% greiðslna í sex mánuði.

Í 10. gr. ffl. er kveðið á um tilhögun fæðingarorlofs. Þar segir í 2. mgr. að með samkomulagi við vinnuveitanda sé starfsmanni þó heimilt að haga fæðingarorlofi á þann veg að það skiptist niður á fleiri tímabil og/eða það verði tekið samhliða minnkuðu starfshlutfalli, sbr. þó 3. mgr. 8. gr. Þegar foreldri hefur þegið greiðslur úr Fæðingarorlofssjóði á því tólf mánaða tímabili, sem lýkur sex mánuðum fyrir fæðingardag yngra barns og líta ber til við útreikning á greiðslum úr sjóðnum með yngra barninu, gildir ákvæði 3. málsl. 2. mgr. 13. gr. ffl. Samkvæmt því ákvæði ber að taka mið af þeim viðmiðunartekjum sem þær greiðslur úr Fæðingarorlofssjóði miðuðust við.

Það tímabil sem miða skal við þegar greiðslur með yngra barni kæranda eru reiknaðar út er sem fyrr segir tímabilið frá nóvember 2008 til október 2009. Óumdeilt er að kærandi þáði ekki launagreiðslur á tímabilinu heldur einungis greiðslur frá Fæðingarorlofssjóði og var því ekki samhliða í skertu starfshlutfalli.

Í 10. gr. ffl. er ekki beinlínis gert ráð fyrir þeirri tilhögun sem kærandi valdi um fyrirkomulag fæðingarorlofs, þ.e. að skipta greiðslum úr Fæðingarorlofssjóði á tólf mánaða tímabil án þess að vera samhliða í vinnu í skertu starfshlutfalli. Sú venja mun hins vegar hafa skapast að Fæðingarorlofssjóður fallist á slíkt fyrirkomulag greiðslna. Ljóst er að í þeim tilvikum að fyrra fæðingarorlof hefur verið tekið samhliða minnkuðu starfshlutfalli á viðmiðunartímabili tekjuútreiknings, sbr. 2. mgr. 10. gr. ffl., ber að skýra 3. málsl. 2. mgr. 13. gr. ffl. svo að greiðslur úr Fæðingarorlofssjóði séu reiknaðar sem hlutfall af viðmiðunartekjum eldra orlofsins þannig að greiðslurnar eru uppreiknaðar í hlutfallinu 100/80. Greiðslur úr Fæðingarorlofssjóði á viðmiðunartímabilinu þannig uppreiknaðar, að viðbættum launum vegna starfa foreldris, eru síðan grundvöllur útreiknings viðmiðunartekna í þeim tilvikum að foreldri hefur verið í skertu starfshlutfalli samhliða fæðingarorlofi. Að teknu tilliti til breytilegra reglna um hámarksgreiðslur o.fl. leiðir þessi aðferð til sömu niðurstöðu og ef tekið er mið af viðmiðunartekjum fyrra orlofs í samræmi við það hlutfall sem fyrra fæðingarorlof segir til um.

Á sama hátt telur nefndin að líta verði svo á að um foreldri, sem er í hlutfallslegu fæðingarorlofi með fyrra barni án þess að vera samhliða í skertu starfshlutfalli, gildi sama regla, þar sem öðrum kosti væri ekki gætt jafnræðis milli þeirra sem dreifa fæðingarorlofi sínu samhliða vinnu í skertu starfshlutfalli og þeirra sem ekki eru í starfi með hlutfallslegu fæðingarorlofi. Hafi foreldri t.d. verið í 50% fæðingarorlofi með eldra barni er sá grunnur sem notaður er til að finna út greiðslur með yngra barni miðaður við 50% af þeim meðallaunum sem notuð voru við útreikning í fyrra fæðingarorlofi. Sama niðurstaða næst með því að uppreikna greiðslur í fæðingarorlofi í hlutfallinu 100/80 auk þess að taka tillit til breytilegra reglna um hámarksgreiðslur o.fl. Fæðingarorlofshlutfall með seinna barni ræður síðan því hlutfalli af fyrrnefndri grunnfjárhæð sem foreldri fær með því barni.

Að mati nefndarinnar nýtur þessi túlkun stuðnings í athugasemdum með frumvarpi til 8. gr. laga nr. 74/2008, sem breyttu 2. mgr. 13. gr. ffl. en þar segir m.a.:

„Enn fremur er gert ráð fyrir að áfram verði miðað við heildarlaun foreldra en þar á meðal verði jafnframt taldar með greiðslur úr Fæðingarorlofssjóði, greiðslur úr Atvinnuleysistryggingasjóði, sjúkra- og slysadagpeningar, greiðslur úr sjúkrasjóðum stéttarfélaga og bætur frá tryggingafélagi vegna tímabundins atvinnutjóns auk hvers konar launa og aðrar þóknanir samkvæmt lögum um tryggingagjald. Þetta eru greiðslur sem koma til þegar aðstæður þær sem taldar eru upp í a–d-liðum 2. mgr. 9. gr. frumvarpsins eiga við um foreldra og teljast svara til þátttöku á vinnumarkaði og þar með til ávinnslu fæðingarorlofs skv. 1. mgr. 13. gr. laganna. Verður því að teljast eðlilegt að þær verði hluti af heildarlaunum foreldra sem lögð eru til grundvallar við útreikninga á greiðslum úr Fæðingarorlofssjóði.“

Þannig getur úrskurðarnefndin ekki fallist á þau rök kæranda að miða skuli við meðaltekjur hennar sem lagðar voru til grundvallar greiðslum í fyrra fæðingarorlofi, án alls tillits til þess að hún dreifði því orlofi á tólf mánuði, heldur ber að taka mið af þeim meðaltekjum sem þar voru lagðar til grundvallar í samræmi við það hlutfall sem fyrra fæðingarorlof segir til um.

Kærandi hagar fæðingarorlofi sínu með barni fæddu Y. maí 2010 með þeim hætti að hún er í 43% orlofi í maí 2010, 50% orlofi í júní 2010 til og með apríl 2011 og 7% orlofi í maí 2011. Að mati úrskurðarnefndarinnar á kærandi því rétt á samsvarandi hlutfalli af þeim tekjugrunni sem gerð er grein fyrir hér að framan, í greiðslur með yngra barni sínu.

Það að greiðslum vegna fyrra fæðingarorlofs hafi verið dreift á lengra tímabil í stað 100% greiðslna í sex mánuði getur að mati nefndarinnar ekki leitt til annarrar túlkunar. Þá er engin heimild, hvorki í ffl. né í reglugerð nr. 1218/2008 að líta til annars tímabils en mælt er fyrir um í 1. málsl. 2. mgr. 13. gr. ffl. í tilviki kæranda. Samkvæmt því ber að staðfesta ákvörðun Fæðingarorlofssjóðs sem tilkynnt var með bréfi, dags. 14. apríl 2010, sbr. leiðrétta greiðsluáætlun, dags. 7. júní sama ár, um útreikning meðaltals heildarlauna kæranda og greiðslna úr Fæðingarorlofssjóði.

 

ÚRSKURÐARORÐ:

Ákvörðun Vinnumálastofnunar-Fæðingarorlofssjóðs um útreikning greiðslna til A úr Fæðingarorlofssjóði er staðfest.

 

 

Jóna Björk Helgadóttir

Heiða Gestsdóttir

Gunnlaugur Sigurjónsson

 



Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum