Hoppa yfir valmynd
2. júní 2010 Félags- og vinnumarkaðsráðuneytið

Úrskurður nr. 2/2010

Ofgreiddar bætur niðurfelling örorkulífeyris.

A

gegn

Tryggingastofnun ríkisins

 

Ú r s k u r ð u r

Mál þetta úrskurða Friðjón Örn Friðjónsson, hrl., Guðmundur Sigurðsson, læknir, og Þuríður Árnadóttir, lögfræðingur.

Með kæru, dags. 29. desember 2009, kærir X fyrir hönd A til úrskurðarnefndar almannatrygginga endurkröfu Tryggingastofnunar ríkisins vegna ofgreiddra bóta vegna áranna 2007 og 2008 og niðurfellingu örorkulífeyris og tengdra greiðslna fyrir árin 2008 og 2009.

Í kæru er þess krafist að endurkröfur á hendur kæranda verði felldar niður og að niðurfelling lífeyris og tengdra greiðsla verði leiðrétt.

Með bréfi, dags. 11. janúar 2010, var óskað greinargerðar Tryggingastofnunar ríkisins. Í greinargerðinni, dags. 10. febrúar 2010, er krafist frávísunar málsins frá úrskurðarnefndinni. Frekari rökstuðningur barst frá kæranda með bréfum þann 15. og 17. mars 2010. Ný gögn voru kynnt Tryggingastofnun ríkisins. Viðbótargreinargerð stofnunarinnar barst þann 25. mars 2010. Í henni segir m.a. svo:

„Afstaða stofnunarinnar í þessu máli er óbreytt þrátt fyrir þessi viðbótargögn. Stofnunin fer eins og áður fram á frávísun málsins frá nefndinni. Rökin eru þau að eftir nýja meðferð hjá stofnuninni mun liggja fyrir ný afgreiðsla þessa máls hjá Tryggingastofnun. Þegar hún liggur fyrir getur kærandi eftir atvikum sætt sig við þá nýju afgreiðslu eða kært hana til úrskurðarnefndar. Tryggingastofnun er þeirrar skoðunar að sú leið að úrskurðarnefndin fresti afgreiðslu fyrirliggjandi kæru þangað til ný afgreiðsla málsins hefur átt sér stað hjá Tryggingastofnun sé hins vegar óheppileg í þessu tilviki.“

Viðbótargreinargerðin var kynnt kæranda.

 

Niðurstaða úrskurðarnefndar:

Úrskurðarnefnd almannatrygginga lítur svo á Tryggingastofnun ríkisins hafi endurupptekið mál kæranda, sbr. 24. gr. stjórnsýslulaga nr.  37/1993. Verður því litið svo á að nú sé málið til endurskoðunar hjá Tryggingastofnun og að stofnunin muni að endurskoðun málsins lokinni tilkynna kæranda hvort ný athugun á máli hennar leiði til sömu niðurstöðu og áður eða hvort ákvörðun annars efnis verði tekin.

Þar sem kærð ákvörðun hefur nú verið endurupptekin og er til meðferðar hjá Tryggingastofnun ríkisins getur hún ekki sætt endurskoðun úrskurðarnefndar almannatrygginga. Þegar Tryggingastofnun hefur tilkynnt kæranda um niðurstöðu vegna endurupptöku málsins getur kærandi lagt fram nýja kæru til úrskurðarnefndar, sé hún ekki sátt við þá ákvörðun.

Með vísan til þess sem rakið er hér á undan er kærunni vísað frá úrskurðarnefnd almannatrygginga þar sem endanleg ákvörðun hefur ekki verið tekin hjá Tryggingastofnun ríkisins.

 

Ú R S K U R Ð A R O R Ð:

Kæru A er vísað frá úrskurðarnefnd almannatrygginga.

 

 

 

F.h. úrskurðarnefndar almannatrygginga

Friðjón Örn Friðjónsson, formaður

 



Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum